اؤلۆ دیریتمک!
یازار : اورمولو
+0 بَیَن
ماللانصرالدین زیارت‌دن قایێدان باش پوُلو قوُرتولوب، آجێندان اؤلۆرمۆش. اوُزاق کندلرین بیریندن گئچَنده، بیر ائودن آغلاماق سسی ائشیدیر. ایچَری گیریب جریانێ سوْروشور. ائو اهلی آغالارێ‌نێن اؤلمۆشۆن گؤستَریرلر. ماللا «لاب آرخایێن اوْلون. من اؤلۆ دیریتمک دوعاسێ باجارێرام!» دئییب، بال-چؤرَک ایسته‌ییر. ائو اهلی تَلَسیک بال-چؤرگی گتیریب، ماللانێن قاباغێنا قوْیورلار. ماللا چؤرگی بالا باتێرێب، اؤلۆنۆن باشێنا دوْلاندێرێب، دوعا اوْخویاراق یئییر. بال-چؤرک قوُرتولاندان سوْنرا، ماللا آیاغا قالخێب گئتمک ایسته‌ییر. ائو اهلی سئوینجَک اؤلۆنۆن باشێنا یێغێشێرلار، آنجاق اوْندا دیریلیک ایزی (اثری) گؤرمه‌ییرلر؛ بئله‌جه ماللایا سارێ(طرف) دؤنۆب، حیرص ایله «بوُنون هاراسێ اؤلۆ دیریتمک ایدی؟!» دئییرلر. ماللا گۆله-گۆله دئییر: «آللاه آغانێزا رحمت ائیله‌سین! اوْ دوعا منی دیریتدی!»
